ՌԴ հարավում երկինքը փակ է․ դեպի Երևան տասնյակ չվերթներ չեղարկվել կամ հետաձգվել են

Դոնի Ռոստովի կարգավարական կենտրոնի դեմ անօդաչուի հարձակումը կաթվածահար է արել է Ռուսաստանի հարավային շրջանների օդային հաղորդակցությունը՝ ուղղակիորեն հարվածելով «Զվարթնոց» միջազգային օդանավակայանի չվացուցակին։ NOTAM ծանուցման համաձայն՝ սահմանափակումները կգործեն առնվազն մինչև մայիսի 11-ի օրվա ավարտը, սակայն հետևանքներն արդեն հիմա են զգացվում․ Երևանում արձանագրվում են զանգվածային չեղարկումներ և երկարատև ուշացումներ։

Իրավիճակը «Զվարթնոցում»

Երևանի օդանավակայանի առցանց ցուցատախտակի տվյալներով՝ միայն մայիսի 8-ին և 9-ին ավելի քան 15 չվերթ է տուժել հարավային ուղղություններով։ Հիմնական հարվածը հասցվել է Սոչի, Կրասնոդար և Միներալնիե Վոդի չվերթներին։

• Սոչի (AER)․ «Ազիմուտ» ավիաընկերության (3F 350/349) մայիսի 8-ի չվերթները ամբողջությամբ չեղարկվել են։ «Աէրոֆլոտի» ինքնաթիռները (SU 600/601) կրիտիկական ուշացումներով են իրականացվում․ Սոչիից ժամանումը, որը սպասվում էր ժամը 11:00-ին, տեղափոխվել է 17:30, իսկ հակադարձ թռիչքը՝ կեսօրից երեկո (18:30)։ Մնացած հաջորդական չվերթների չեղարկման բարձր հավանականությունը պահպանվում է։
• Կրասնոդար (KRR)․ օդային հաղորդակցությունը գրեթե ընդհատվել է։ «Ազիմուտի» չվերթները (3F 394/393) չեղարկվել են։ «Աէրոֆլոտի» երեկոյան չվերթը (SU 614/615) հետաձգվել է ավելի քան մեկուկես ժամով։ Առաջիկա օրերին չվերթների չեղարկման հավանականությունը մնում է բարձր։
• Միներալնիե Վոդի (MRV)․ «Ազիմուտ» և S7 ավիաընկերությունների ցերեկային չվերթները (A4 6029/6030 և S7 4053/4054) մայիսի 8-ին չեղարկվել են։ Թեև մայիսի 9-ի որոշ առավոտյան չվերթներ դեռ նշված են «ըստ մեկնման չվացուցակի» կարգավիճակով, կարգավարական կենտրոնի վնասների ծավալը հաշվի առնելով՝ դրանց չեղարկումը նույնպես չափազանց հավանական է։

Ռուսաստանի հարավի երկնքի փակումը՝ հարկադրված միջոց է։ Ռոստովի կարգավարական կենտրոնը օրական համակարգում էր մինչև 2 հազար չվերթ, ներառյալ տարանցիկ թռիչքները Հարավային Կովկասի և Մերձավոր Արևելքի երկրներ։ Ներկայում Ռուսաստանի 13 կարևոր օդանավակայանների աշխատանքը դադարեցված է։ Սահմանափակումները ազդել են Աստրախանի, Վլադիկավկազի, Վոլգոգրադի, Գելենջիկի, Գրոզնոյի, Կրասնոդարի, Մախաչկալայի, Մագասի, Միներալնիե Վոդիի, Նալչիկի, Սոչիի, Ստավրոպոլի և Էլիստայի ավիացիոն հանգույցների վրա։

Ի՞նչ պետք է անեն ուղևորները

Տրանսպորտի նախարարությունը զգուշացրել է թռիչքների ծրագրի զգալի կրճատման մասին։ Դոնի Ռոստովում մասնագետները գնահատում են վնասված սարքավորումների վիճակը, սակայն մինչև մայիսի 11-ի ժամը 23:59-ը չվացուցակի կայունացում ակնկալել պետք չէ։

Ռուսաստանի հարավային քաղաքներից Երևան ժամանող և հակառակ ուղղությամբ թռչող չվերթների ուղևորներին խստորեն խորհուրդ է տրվում օդանավակայան մեկնելուց առաջ ստուգել իրենց թռիչքի կարգավիճակը, քանի որ չեղարկված չվերթների ցանկը մոտակա ժամերին կարող է լրանալ։