Գյումրեցիները տոնում էին, ՔՊ-ականները՝ նեղվում․ Սամվել Կարապետյանի հովանավորած «Գյումրու օրը»

Գյումրին հոկտեմբերի 17-ին տոնում էր իր օրը, իսկ քաղաքի տոնակատարությունը քաղաքական հակադրությունների հերթական առիթն էր դարձել։ Մինչ գյումրեցիները մասնակցում էին համերգին ու տոնական միջոցառումներին, ՔՊ-ականների շրջանում միջոցառման նկատմամբ վերաբերմունքը միանշանակ չէր։

Այս տարի «Գյումրու օրվա» տոնակատարության հովանավորը գործարար Սամվել Կարապետյանն էր։ Հենց այս հանգամանքն էլ միջոցառմանը քաղաքական երանգ էր հաղորդել՝ հաշվի առնելով Կարապետյանի և իշխանության միջև առկա հակասությունները։

Factum.am-ի դիտարկմամբ՝ տոնական հրապարակում քաղաքացիների ներկայությունն ու միջոցառման նկատմամբ հետաքրքրությունը հակադրվում էին քաղաքական դաշտում ծավալված քննարկումներին։ Գյումրեցիների համար օրը նախևառաջ քաղաքի տոնն էր, մինչդեռ քաղաքական շրջանակներում քննարկման առարկա էր դարձել նաև այն հարցը, թե ով է կանգնած միջոցառման հովանավորության հետևում։

Ստացվում է՝ Գյումրու օրը կրկին միայն տոն չէր․ այն նաև ցույց տվեց, թե ինչպես կարող է քաղաքի համար կազմակերպված միջոցառումը վերածվել քաղաքական հակադրությունների առիթի։ Իսկ գյումրեցիների համար գլխավոր հարցը, թերևս, այն էր, թե ինչպես արժանապատիվ ու ուրախ տոն ունենալ սեփական քաղաքում՝ անկախ քաղաքական հաշվարկներից։

Ա.Ղազարյան